超尷尬！《SBS歌謠大戰》成燦Sion主持甩碌被狂轟！

由韓國電視台SBS主辦嘅夏季音樂盛典《2026 SBS 歌謠大戰 SUMMER》剛剛喺星期日（9日）舉行，喺直播期間突然出現主持「甩碌」嘅荒謬場面，甚至出現製作組人員衝上台幫手睇 Cue卡嘅畫面，引嚟唔少觀眾嘅批評，直指係「近年歌謠大戰最尷尬主持事故」！

今次歌謠大戰邀請咗Stray Kids、ATEEZ、Red Velvet、RIIZE、NCT WISH 等28組團體演出，當日嘅MC則由 RIIZE嘅成燦、Hearts2Hearts嘅Ian，以及 NCT WISH嘅Sion 擔任，並透過YouTube頻道「SBSKPOP X INKIGAYO」直播。喺轉場過渡期間，Sion突然停低唔講嘢，成燦即刻極度慌張咁環顧四周，而Ian似乎仲未察覺到出咗錯，只係左右搖等緊下一步指令，現場甚至傳出「我哋不如再嚟一次？」嘅聲音。最後，製作組人員急忙衝上舞台，幫Sion確認Cue卡上嘅內容，而呢個畫面直接原汁原味咁播出嚟。

節目播出後，網上湧現大量指責主持準備不足嘅留言：「到底有冇綵排過？」、「收到台詞唔係應該預先讀熟同對好咩？」、「三個人完全冇默契，好似根本冇綵排過咁」、「明明白紙黑字睇住台詞都可以出錯，仲要咁尷尬」、「出咗錯仲喺度笑？」。更有部分觀眾對今次主持嘅人選組合表達不滿：「咁樣明目張膽偏心 SM 咩？」、「做咩連一個有經驗嘅前輩都唔加進去？」、「明知係直播，仲要搵經驗不足嘅成員嚟做主角？」，批評聲音甚至蔓延到對主持人選同製作過程嘅質疑。

不過，亦有少數人認為，直播節目本來就隨時會有突發狀況發生，將所有責任歸咎於主持身上似乎有點過火。《2026 SBS 歌謠大戰 SUMMER》嘅演出實況預計將於8月17日正式播出。