舞台劇《大龍鳳》肥腸生意外！張繼聰「神執生」兼送彩蛋

由 #廖子妤、#吳冰、#何嘉莉 及 #徐浩昌（#肥腸）主演、#張繼聰 有份監製嘅舞台劇《#大龍鳳》，日前迎來第 21 場大結局圓滿落幕。點知尾演出時發生意外，舞台上嘅道具門鎖竟然壞咗，搞到肥腸當場被反鎖、困喺後台出唔到嚟！

舞台劇最考驗嘅就係臨場反應，身為監製嘅張繼聰同幕後團隊臨危不亂，即時透過對講機指引肥腸，由另一邊嘅通道繞道化解危機，而台上一班演員亦非常有默契咁撐住現場，成個過程流暢到觀眾一度以為係劇情一部分！

最有趣嘅係，喺謝幕時阿聰竟然率領全體演員，「特別重演」肥腸被困一幕，將一場意外變成爆笑彩蛋！肥腸說：「當時我意外被反鎖在室內，事發突然，我嚟唔切諗咁多，第一時間嘗試開門、嘗試用各種方法脫困。正當我未反應過嚟，工作人員已趕嚟協助。」他認為今次意外展現團隊默契和臨場應變能力，今次尾場親歷小危機，他說：「為整個演出旅程畫上了最圓滿、最完整的句點」