周星馳激罕受訪全靠《430穿梭機》！黎芷珊自揭當笑點測試員
周星馳新作《功夫女足》已正式在香港及澳門上映，自7月率先在內地上映以來，票房一路長紅，勢如破竹，目前正穩步衝破25億元人民幣大關（約合29億港元），成績斐然。向來少接受訪問的周星馳，激罕答應黎芷珊現身訪談節目《一周星星》，同場更有劉嘉玲！
向來低調的星爺願意開金口受訪，全因和黎芷珊識於微時的深厚情誼，早在八十年代他們在無綫節目《430穿梭機》相識，黎芷珊坦言覺得難以置信：「《一周星星》諗住派我出去成數會高啲，點知真係成功咗！可能佢見到係熟人，所以先一口應承。」
回憶初相識，黎芷珊打趣的以「怪怪地」來形容當年的周星馳：「我記得剛加入《430穿梭機》冇耐，有次同星爺去沙灘拍外景。當時導演喺沙灘上向大家介紹我係新主持，點知星爺竟然完全冇理會，自己一個人行開咗，踎喺海邊玩緊一隻浮咗上沙灘嘅水母！」
黎芷珊笑指當年的星爺已經是「非一般」的主持人，不但從不刻意裝出可愛模樣去討好小朋友，反而經常在鏡頭前與現場的小觀眾「鬥嘴」，更大爆自己當年是星爺的「御用笑點測試員」：「佢會成日喺你身上嘗試佢嘅天馬行空，諗到咩橋段就會突然行埋嚟講畀你聽，睇吓你笑唔笑，用呢個方法去Test自己嘅想法到底中唔中，真係非常搞笑。」
黎芷珊與周星馳對上一次公開同場已經是2013年，當時她擔任對方的電影《西遊·降魔篇》發佈會司儀，事隔13年因為《功夫女足》聚首，黎芷珊說：「開頭都有啲擔心，因為近年睇佢做一啲訪問，我好驚佢一句起兩句止，好難接話。」之前還以為今次訪問難度高達8分的她，隨着星爺踏入錄影廠的那一刻，即放心晒！她說：「一見到佢入嚟同大家打招呼，我就知道搞掂晒，完全係搵返以前同老朋友相處嘅感覺。」最令黎芷珊心花怒放的，是周星馳每次見面都必定會使出他的「冧女絕招」，劈頭第一句就笑著問：「點解你個樣冇變過嘅？」
《功》片正式在香港上映，已有大批觀眾即捧場兼睇到尾，因為香港版有獨家片尾彩蛋，就是星爺講廣東話對白現身，唔少星爺迷激讚：「為咗聽星爺最後嗰幾句廣東話，買飛入場都已經值回票價！」
Comments