前女友狂爆私生活醜聞！ Xdinary Heroes 隊長Gun-il退團兼解約！

K-Pop 再爆震撼彈！JYP Entertainment 震撼宣佈旗下樂隊 Xdinary Heroes 隊長兼鼓手Gun-il正式退團兼與 JYP 解約！

事源近日有自稱係Gun-il前女友嘅「A 氏」，喺韓國網上論壇大爆料，曝光兩人私下對話之外，更指控Gun-il私下爆粗惡意批評粉絲，引發全網集體公憤，Gun-il形象瞬間崩塌！

 JYP緊急發聲明：即日起退團 + 終止合約

JYP正式發表官方聲明，宣佈Gun-il退出團隊：「我哋向一直以來珍視同支持 Xdinary Heroes 嘅粉絲致以最深嘅感謝，同時向大家通知成員Gun-il未來活動嘅相關事宜。

就近期有關成員Gun-il嘅爭議，我哋深刻認識到事態嘅嚴重性，並與藝人進行咗深入且多方面嘅討論。最終，我哋認為Gun-il已無法繼續進行團體活動，經雙方協議後，決定終止專屬合約。 Gun-il由即日起正式退出 Xdinary Heroes，並結束所有團體活動。對於呢個突如其來嘅消息向粉絲帶來擔憂，我哋致以最深嘅歉意。」

 樂隊將以 5 人體制繼續前行

Gun-il作為隊長突然爆出醜聞退團，對樂隊無疑係極大打擊。不過 JYP 表示 Xdinary Heroes 未來會以 5 人體制繼續活動，希望粉絲能繼續給予支持。