THE BOYZ重組以9子體制開動！成員New暫留原公司

韓國男團THE BOYZ之前同所屬公司ONE HUNDRED LABEL發生合約爭議後，今日正式宣布團體未來動向。9位成員上淵、JACOB、泳勳、賢在、柱延、KEVIN、Q、善旴及ERIC今日正式聲明宣布，繼續以 THE BOYZ 名義進行團體活動，並已經完成咗團體活動嘅合約簽署，目前佢哋正喺全新成立嘅 Label 體制之下準備緊緊接落嚟嘅活動。目前仍留喺ONE HUNDRED LABEL旗下嘅成員NEW，短期內預計唔會參與THE BOYZ活動，因此THE BOYZ現階段將以9人體制運作。

成員們表示：「9 個人要一齊走落去呢個心意，由始至終都冇變過。最重要嘅係，想第一時間向一直等待同擔心 THE BOYZ 團體活動嘅歌迷傳達呢個消息。我哋會喺各自嘅位置上盡最大努力，同時為咗將同歌迷一齊累積嘅寶貴時光以 THE BOYZ 嘅名義繼續延續落去，我哋會全力以赴。」

「真心感謝一直以來為我哋送上不變嘅愛同支持嘅 THE B（THE BOYZ 官方粉絲名）。為咗可以用更好嘅面貌回報大家，我哋會好好準備，希望大家多多支持。」THE BOYZ補充。

成員們強調「為一直抱住漫長等待同擔憂嘅 THE B 作出決定」視為首要任務，認為守護同歌迷一齊累積嘅時光與信任比任何事都重要，所以優先明確整理未來團體活動方向，之後再開展個人活動嘅準備，未來9名成員嘅個人演藝工作，將分別各自與公司洽談合作，成員強調，即使各人所屬嘅個人經紀公司不同，仍會尊重每個人發展方向，維持緊密合作，確保THE BOYZ團體活動不受影響。

今年3月THE BOYZ 成員除了New，以信任破裂為由，向舊公司 ONE HUNDRED 通知終止合約，並向法院申請假處分以暫停合約效力。直至4月，法院批准咗假處分申請，正式暫停 9 位 THE BOYZ 成員同 ONE HUNDRED 嘅專屬合約。