Stray Kids霸氣回應格林美風波：唔在意外界點睇，令STAY滿意先至重要！

第 69 屆格林美獎（Grammy Awards）宣佈新增「最佳亞洲流行音樂表演」（Best Asian Pop Music Performance）等 5 大獎項，隨即引爆全球爭議，外界質疑大會用地理及語言來劃分，是「音樂上的種族歧視」，疑似變相未能角逐綜合類大獎，只能在亞洲專屬獎項中競爭。防彈少年團（BTS）率先開火表態，成員喺 SNS 宣佈「今年絕不報名杯葛 Grammys」，強調音樂應回歸本質，不應被地區或語言限制！

繼BTS表態後，Stray Kids 於（6日）下午出席全新迷你專輯《THIS & THAT》發行記者會，面對現場媒體追問「報名 Grammys 意向」時，展現出高 EQ 且謹慎嘅態度。

成員昇玟表示：「當我哋分享自己鍾意嘅音樂同舞台演出時，都會用源自自己內心深處嘅故事嚟寫歌詞。比起外界嘅眼光，我哋更傾向於傾注自己想講嘅故事。」、「喺世界舞台上，我哋感受到 K-Pop 嘅影響力，亦體會到音樂作為媒介能為好多人帶來力量。未來我哋會繼續努力，希望創作嘅音樂可以傳遞畀更多人。」

對於是否報名格林美，Stray Kids並冇直接回應，當再次被追問相關問題時，成員鉉辰補充：「Stray Kids 活動期間，從來冇將得獎結果或者打破紀錄當做目標，今次專輯亦都一樣。我哋嘅目標同夢想只係想證明自己，將粉絲嘅滿意同幸福放在第一位。」

Stray Kids 將於 7 日下午 1 點（KST），相隔約 9 個月，正式推出今年首張全新作品《THIS & THAT》！今次主打 Chill 爆又 Cool 嘅大膽曲風，唱出打破框架、做自己想做嘅豪邁自信。

繼去年正規四輯《KARMA》同《DO IT》之後，今次全新迷你專輯能否助佢哋再創神話，登頂美國 Billboard 200 榜單達成「連續 9 次奪冠」嘅驚人紀錄？全世界樂迷都在拭目以待！