Army心痛！BTS泰亨聽力剩 30%！還原兩年半抗病始末

各位ARMY睇完BTS嘅V金泰亨同柾國嘅 Weverse 直播，係咪個心揪住揪住咁痛？

防彈少年團（BTS）喺美國舉行《ARIRANG》世界巡迴演唱會，當大家以為泰亨退伍回歸之後狀態大勇，但估唔到佢喺直播入面，居然以雲淡風輕嘅語氣自白：「我從來無同 ARMY 講過，其實我嘅聽力變差，已經有兩年半喇。」

泰亨仲好坦白咁用數字比例去解釋，如果左耳聽力係 100%，佢嘅右耳依家其實只聽得到 30% 左右！最令人心酸嘅係，泰亨透露耳疾喺入伍服役期間明顯加重，但當時有人同佢講「呢啲只係意志力問題」，結果連泰亨自己都被「催眠」咗，就咁咬緊牙關默默苦撐咗兩年半！直到近期回歸樂壇、面對演唱會高分貝嘅巨大音量音響，佢先驚覺唔對路。

直播中柾國聽到，即刻好緊張咁話「唔可以咁樣啊，一定要好好睇醫生」！泰亨安慰大家，話自己依家好聽話，每日都有準時吃藥同積極定期去醫院接受治療。大批ARMY隨即淚崩，紛紛翻查返過去一兩年嘅演唱會同花絮片段，先驚覺泰亨喺台上成日要中途除低耳麥，或者同隊友傾偈時，要「擰轉身聽」，全部都係因為佢聽唔清！作為一個對音樂、對舞台有極高追求嘅世界級歌手，難以想像佢背後到底克服咗幾多恐懼，先可以用 30% 嘅聽力，每一次交出完美神級舞台。