10歲ACE TALENT冠軍陳灝楠Ethan打破身材框架舞出彩虹 IG跳舞片飆破10萬Views

一個身形圓滾滾、模樣超可愛、架着眼鏡的10歲小男孩，在舞台上踏著自信舞步，動作清脆俐落，爆發力十足，每一次旋轉跳躍震撼心弦帶來能量。他，就是剛在《ACE TALENT 演藝模特大賽》中勇奪小學組冠軍的#陳灝楠Ethan 。身為YS韓國偶像學院尖子 的Ethan，憑藉著超凡舞蹈及舞台魅力，Ethan 不僅征服現場評審，其在IG上發布的跳舞片更掀起熱討，用實力證明，天賦和努力從不受限於年齡及身材框架。

回想當初接觸舞蹈的契機，Ethan 笑言一切源於偶像：「其實我細個已經好鍾意睇韓國女團MV，會跟住MV入面嘅舞蹈一齊跳，就係呢個契機令我接觸舞蹈，慢慢發覺自己好鍾意跳舞，可以隨住音樂盡情釋放自己，愈跳愈愛上舞台同排舞嘅感覺。」

然而，大眾對於舞者往往有著既定的刻板印象，認為唯有纖細苗條的身材才適合走上舞蹈之路。一身可愛肉肉身型的Ethan說：「呢個肉肉嘅身型對我嚟講唔係阻礙，反而係我個人特色！雖然唔係標準舞者體型，但我一樣可以做到敏捷動作、爆發力同節奏感，我都希望透過自己嘅表演打破呢個刻板印象，話俾大家知唔同身形，一樣可以站上舞台好好表現。」

去年《ACE TALENT演藝模特大賽》大賽中，Ethan 飽受落敗的打擊。當時的他雖然感到失落，卻並未因此氣餒，反而藉由這次經驗看清了自己的不足。為了克服高難度快舞帶來的體能瓶頸等問題，Ethan 選擇捲土重來，加入 YS 韓國偶像學院接受正統韓式演藝培訓。

談到這段訓練過程與收穫，Ethan 感恩地說：「體能耐力提升，長時間排舞都可以維持狀態；動作爆發力、乾淨度同節拍掌控穩定好多，亦都學識韓式表演重視嘅表情管理，唔只係機械式跟動作，仲要將情緒融入表演入面。校監Dr. Angel唐安麒同社長Yong Heo平時都好關心我哋呢班小朋友，成日鼓勵我哋，除咗教舞蹈同舞台技巧，亦都會提醒我哋要有禮貌，同埋要懂得關心身邊同學，呢一點令我印象好深刻。」

今年的《ACE TALENT》舞台，成為 Ethan 突破自我的最好見證。當大會宣布他榮獲小學組冠軍的那一刻，過往所有的汗水與努力都化作了無比的榮耀。而Ethan 在 Instagram 上發布的跳舞短片更突破了十萬次瀏覽，無數網民被他充滿能量的自信舞姿與不畏挫折的勇氣所打動。面對讚賞與支持，Ethan說：「最意想不到嘅係原來我嘅故事，可以鼓勵到好多唔認識嘅人堅持自己鍾意嘅事。而呢一份IG上面嘅人氣同大家嘅支持，亦都令我更加有信心拍多啲唔同嘅跳舞短片同大家分享。」

Ethan有無條件支持他的父母，成為追夢路上最堅實的後盾。父母深知他對舞蹈的熱情，平時不但親自接送他上堂、到場為他比賽加油打氣，同時也提醒他不能鬆懈學業。為了平衡學業與舞蹈，Ethan 展現出極高的自律，透過提前制定時間表，在上課日專心完成功課，放學與假日則全力投入訓練。

面對未來， Ethan 的終極夢想是踏上更多大型舞台，成為一個能用舞蹈傳遞正能量、鼓勵他人的表演者。「想同其他熱愛跳舞、但唔夠自信嘅朋友講，唔好因為外表、身材或者覺得自己年紀細、唔夠好就唔敢試！好似我細個都只係跟住MV跳舞開始，每個人都有自己獨特風格，熱愛同自信先係最重要。踏出第一步，堅持練習，唔好怕唔完美，就算輸過都唔使灰心，慢慢進步，你都可以喺舞台發光！」