洪嘉豪Kiri T Gordon Flanders轉出糧戶口即「加人工」葛民輝靠一招做老闆
- 韓港報小編
- Apr 30
- 2 min read
日前潮流教父葛民輝，歌手洪嘉豪、Kiri T及Gordon Flanders為恒生銀行Preferred Banking廣告拍攝，洪嘉豪說人生首份薪金是在快餐店工作：「我第一份工係喺快餐店做暑期工，出糧戶口都係阿媽幫我搞。做咗差不多兩個月暑期工，份糧只得3千多元。」Kiri T則說打第一份工時，不久即被炒，雖賺得幾百蚊，但她把這份薪金存入當時媽媽幫她開設的儲蓄戶口：「我第一份工喺咖啡店工作，不過未過試用期就被炒，因為我太廢！記得做咗一星期左右，賺到幾百蚊。」
出道大概兩年的Gordon表示：「我第一份人工就係幫嘉豪寫歌，一出糧就用嚟交租！而我用嚟出糧嘅銀行戶口，就係屋企樓下最近嘅銀行開嘅。」Gordon和Kiri T及洪嘉豪異口同聲說知道揀啱出糧戶口，就可以變相「加人工」。
阿葛說人生第一份人工是以支票出糧：「以前出糧會盡量要求收支票，阿媽睇紅簿仔時就唔會知我真實有幾多人工，俾家用可以年年一樣。我呢啲咁早成家立室嘅，太太會幫我plan好，一出糧已經分配好安排好，我一早已經有個『人生嘅Preferred Banking』！」
藝人收入不穩定，當大家說到加人工妙法時，Kiri T竟然提出：「轉公司囉！」即令同門師兄弟洪嘉豪及Gordon Flanders嘩然，洪嘉豪笑指：「上年公司幫你做到咁好成績，你竟然話轉公司！」Kiri立刻澄清：「唔係講我自己，係聽啲返朝9晚5嘅朋友講，可以試吓轉工，咁舊公司為咗留人或者新公司挖角都會加人工。」
Gordon直言幫公司每一位歌手寫歌，多勞多得，希望續約時可以加人工，洪嘉豪笑指他用更多的努力換取更高人工，這不是真正加人工！阿葛撐Gordon：「幫多啲不同歌手做多啲好歌，然後有好成績就可以加價了！我正式返工嘅頭兩年人工低，當時十分勤力工作，唔怕蝕底、唔怕OT，幾乎每3個月就會升職加幾百蚊，跟底薪比例算高。之後轉工加入電台工作，冇主動爭取加人工，反而努力做其他瓣數，例如電影，令自己人工加少少！」
Comments