Twins早前宣布將於明年1月在紅館舉行演唱會，門票優先訂購爆滿後，已宣布由原本的6場加開至8場，門票於半小時內全被掃清。今天（9日）Twins宣布再加開明年2月1日至4日的場次，4場門票將於15日（下周五）城市售票網公開發售。
對於有不法之徒在網上指Twins演唱會招聘保安、檢票員等職位，演唱會總監馮貽柏表示，從來沒有進行過任何這些職位的招聘，勸喻歌迷千萬不要受騙，把自己的私人資料或電話等給予這些網站，小心保障個人利益。
Twins相隔9年再次踏足紅館，一開就開12場！蔡卓妍（阿Sa）及鍾欣潼（阿嬌)打破Twins開演唱會的紀錄，阿Sa笑說：「其實真係救到我燃眉之急，我真係好唔夠飛，之前我仲用自己嘅飛行里數去換番自己演唱會啲飛，換完都係唔夠，幫唔晒朋友訂，依家再加，咁即係有救啦，哈哈....唔駛啲朋友唔開心，話我辦事不力。歌迷都不停留言畀我，話搶唔到飛想喊，所以我哋今次特別為佢地搞緊一場加場，係歌迷會專場，咁希望大家都可以真係一齊入到嚟，同我哋一齊共渡到22週年，呢個咁值得紀念日子。」
阿嬌說知道再加場後，感到既愕然又驚喜：「做咁多場 ，體能上都有少少擔心㗎，但會盡全力去做！已經開始戒緊肉，剩係食菜呀，海鮮咁，因為只食齋又怕唔夠營養，記緊歌詞排緊舞啦。」
阿Sa則說：「唔好講咩紀錄啦，我剩係會諗，襯行得走得，做到咪做多幾場囉，再老啲唔知自己頂唔頂到啦嘛，做到就做囉。我就兩個月前已經開始管理自己啦，已經食緊健康餐，同埋練體能，依家瘦咗好多呀，咁唔可以剩係瘦，因為都要體力，所以不停有做運動增肌肉囉。本來唱8場，我同阿嬌話，不如一氣呵成啦，唔駛停唱晒佢，免得好似蝕左度氣咁嘛，但係依家12場，中間就會有休息日啦，都要休一休再做，應該狀態會好啲。 」
Comments