MC張天賦以今年最後一首派台作品《Overkill》再次自我挑戰，於MV中以跳唱配合暗黑曲風及霸氣節奏，把MV中角色「亦正亦邪」氣質淋漓發揮。在MV拍攝前，由十月開始MC練舞，怎料在拍攝MV時的首個跳舞鏡頭，因踏空而拗柴跌倒，腳腕腫痛，但他包紥後繼續拍攝，由早上6點開始，拍至翌日早上7點才收工，忍痛超過20小時。
《Overkill》歌詞其中一句：「有痛要痛到過度」，今次忍痛拍攝是否實現了「痛到過度」的感覺？MC笑說：「記憶當中，應該未去到最痛嘅，暫時對我嚟講，最痛應該係紋身，唔係，係紋眉，都唔係，係紋完眉要洗眉，哈哈。」
MC說：「第一個shot已經拗柴，當時我諗應該捱到廿個鐘頭，但傷勢好反覆，工作人員買咗止痛噴霧俾我頂到一陣，所以成晚係不停由唔痛去到痛，再唔痛又去返痛咁。」他說今次受傷，令他立定決心，以後要跳舞或表演時，要慎選合適的衫褲鞋物：「一來，拍攝場地又因為地面濕滑啦，所以大家真係要『小心地滑』喇！二來就係對鞋實在太高，所以一旦唔小心踩空就會出現扭親現象。」
MC說這個MV打破多個第一次，包括第一個最大製作的MV、第一次要連續拍攝25小時、以及第一次拍攝受傷等：「中間我只係瞓咗半個鐘左右。全日都幾乎係一個亢奮狀態，因為想件事可以做得好啲，成個畫面靚啲，我都擔心一瞓就會開始腫，個狀態追唔上，所以一路都盡量同自己講唔好瞓覺。同埋，喺MV我食咗好多嘢！食咗好多餐！哈哈。」
MV角色亦正亦邪，配合歌詞：「有喪要喪到過度」，MC笑自己是「絕對係一個喪嘅人！」：「翻睇MV嘅時候，我都覺得自己有好多鏡頭係好意想不到，好邪惡好狡猾，幾有型。但現實中我都覺得自己係一個all in or nothing 嘅人嚟，即係我都覺得我係，都幾喪吓嘅!」
Comments