於今晚（9日）在紅館展開跨年演唱會序幕的歌手陳奕迅（Eason），在開騷前發布新歌《人啊人》MV，此曲由林家謙作曲，周耀輝填詞，李榮浩編曲，MV由執導《手捲煙》的金像獎新晉導演陳健朗執導，以一個人瀕死的第三觀視覺，帶出「人是甚麼」、「人應何去何從」的課題，從而道出人生如夢幻泡影、如露亦如電，何必再有執念。
Eason說收到林家謙demo時，非常喜歡這歌，因為林家謙在Demo唱了一句: 「Who we are？」令Eason想到「人」這個題材，Eason說：「我同耀輝講咗個構想，佢寫左份非常出色嘅歌詞俾我，佢喺歌詞裏不停問問題，結論留俾聽歌嘅人去思考。」
MV花了近二十小時拍攝，單是吊威也，就吊了三小時，Eason說有點腦充血見暈，他笑說：「其實我唔知拍緊咩。好耐冇試過咁拍MV，不過我信導演！哈哈。我同阿朗傾過幾次偈，佢有好多唔同諗法，好創新，所以我交晒畀佢，佢叫我做咩就做咩。吊威吔都辛苦，因為我冇受過訓練，核心肌群Core Muscle唔夠力，因為好多動作都係靠核心肌群發力，所以我成日喺半空中自動後空翻，hold唔到好耐。好彩今次班武指都係合作過晒，佢哋好好，不停教我點做。」
在MV中Eason被淋黑漿，Eason說：「淋落嚟嘅，似芝麻糊混合類似小朋友玩個啲『鬼口水』，導演話食得嘅，哈哈！淋咗四、五次，自己好似變咗條鱷魚，因為黑漿流咗入眼，好似有層霧咁，似鱷魚眼睛灰灰哋。」
為開騷已排練多時兼減少出外的Eason，說個唱給他壓力：「見到演唱會大家咁支持，啲飛賣得咁好，都有壓力，演唱會始終係一件好大嘅事，有時我都會驚一驚，驚自己唔知做得好唔好。但每當呢啲時刻，個天就會派人嚟鼓勵我，例如身邊朋友，或者係街上面，都有好多鼓勵，行過撞到就會有人同我打招呼，然後話：『你啲飛好難買呀！加油呀！』真係好溫暖。多謝大家，咁多人錫我，我會加油做好每一場。」
MV用了不少CG及試驗性的特技，導演陳健朗在開場用了一個白色山丘沙漠的荒蕪畫面，突然進入人的心臟世界，再抽回來時才驚覺，那個荒蕪山丘是Eason的裸體。脫離肉體後的Eason通往其他次元，穿梭在多維度宇宙之間，舞者成眾生曼陀羅，引爆的七色能量流動場，帶出貧富貴賤、有無虛實、深淺高低，皆是妄心起滅，有為無為皆由自己，畫面到最後用全白，就是煙飛灰滅時，心常空寂，湛然清淨。陳健朗說：「畫面是想表達一個人瀕死期間的經歷，部份研究表示，人死後仍可有時間回顧一下整個世界，所以我們大膽幻想，當你離開肉身成為另一種存在時，用第三身看人生又是什麼？」
Comentários