將於7月舉行13場紅館演唱會的樂壇天后鄭秀文（Sammi），近日推出新歌《心魔》，早前專程到泰國取景拍攝充滿電影感的MV，拍攝手法之破格，Sammi說是以來從未試過。MV在泰國的舊式劇院和私立學校取景，導演Kero及40位舞者和排舞師等幕後班底，全是泰國最頂尖的陣容，難怪每個畫面都帶來震撼！
能和頂尖班底促成合成，Sammi說是源於一首歌的MV：「喺YouTube睇到一首歌嘅MV，呢位導演拍攝嘅風格，我好鍾意，入咗腦，記喺心裏，有一種好大嘅撼動，覺得如果搵到佢拍一定可以將首歌昇華。多謝經理人（郭啟華）真係搵到呢位導演進行呢件事。」
全團的專業及投入，能活生生的勾勒出《心魔》的靈魂，就連Sammi都說，很有毛管戙之感。「整個拍攝我覺得非常值得，團隊專業不在話下，佢哋處理畫面、意境，歌詞裏面最深入嘅靈魂，我覺得係拍到呢首歌嘅靈魂，呢一點相當重要，我自己一路拍攝，某啲鏡頭我都會起雞皮。Dancers唔只係跳舞，佢哋身體嘅律動，有好多情緒喺入面，絕對幫助我呢首歌將個畫面處理到真係極緻嘅狀態。」
MV中Sammi有多個獨特的造型，如其中一個造型，是要在身上貼有紋身貼紙，要花上近四十五分鐘剪貼，問到最難忘是那個時刻和造型？她說：「每一個時刻、每一個場境我都好鍾意，導演處理每個場口和細節，燈光和意境都好唔一樣，再加上我為咗呢個MV做咗好多唔同image，都係為呢隻歌營造氣氛，每一個場景我都未拍過，就連類似都未試過，所以好新鮮。」
「至於我嘅準備，我即刻諗到歌曲混音部份，點樣做先能夠將歌曲嘅意境提昇？點樣將成首歌嘅歌詞、音樂嘅靈魂完全呈現？去到現場，最大嘅震動係處理舞蹈，甚至對嘴唱歌部份，有好多連我自己都意想不到，有好多好深嘅情緒走咗出嚟，令到畫面好強烈，因為情感好真，Dancers亦都係帶住豐富情緒演繹，某啲場面有啲毛管戙，因為一切係來自真摯嘅情緒。」
Comments