歌手張敬軒的《REVISIT張敬軒演唱會》連日來有不少圈中好友包括林家謙及楊天宇（Angus）等捧場，就連為軒仔診治新冠肺炎、近90歲的中醫陳醫師亦和太太也來睇騷！原來軒仔確診後兩個月未能完全康復，在朋友介紹下接受陳醫師醫治，軒仔說只服用3劑有原隻蛤蚧的中藥後痊癒。
軒仔說：「每一次去睇症，見到有啲生活比較困難、住喺附近嘅居民嚟，醫師都會送藥。我喺香港生活咗20年，最吸引我嘅就係呢度嘅人情味。」他指陳醫師不像90歲，更笑說反問對方：「其實你食咗啲乜嘢？係咪日日都食蛤蚧？」並說之前在IG直播時曾介紹對方，但之後對方說：「張生，我退休啦，你唔好再介紹人俾我啦！」
今次軒仔開騷，大批忠粉當然花盡心思，為了今次演唱會製作各式各樣的應援物資，軒仔笑說：「我唔知乜嘢係『應援』㗎，我係2000年出道嘅歌手，聽到『應援』呢兩個字，只覺得『援』字後面係跟個『交』字。其實我已經入行20周年，但大家仲咁支持我，實在好感恩。」
另外，軒仔特別提及林家謙為他寫了多首好歌，令專輯《Senses Inherited》銷量達至金唱片並三度翻印，現場有大批樂迷要求二人合唱，軒仔即說㑹慎重考慮合作開Show後，即令全場狂呼叫好，尖叫聲震耳欲聾。
Comments