今年1月叱咤頒獎禮，是姜濤腳傷後首次露面，《鏡中鏡》躋身叱咤十大，他由台上唱到台下，肉緊投入的演繹引來不少批評，也成為第11胎《Dummy》的訊息。《Dummy》是姜濤今年首支派台作品，由KW朱敏希作曲、梁栢堅填詞、Y.Siu編曲、Edward Chan監製，並邀得來自台灣的強勁幕後班底打造MV，《Dummy》的誕生源於在叱咤引起的風波，令他改變注意，由計劃推出輕快的歌曲，改為推出一首能剖白自己心聲，以及時刻能提醒自己的作品。
姜濤說：「叱咤之後，對於自己好多表現都好唔滿意，所以希望出一隻自嘲嘅歌，藉歌曲提醒自己要保持清醒，觀眾無論鬧或讚，我都能夠勇於去接受，因為有人鬧有人話，都好過冇人留意，而且仲有好多進步空間。因為想帶出呢個Message，所以用咗3、4個月籌備歌曲。」
初聽demo時還以為是台灣創作人的作品，姜濤細問下才知是本地創作：「朱敏希都係第一次嘗試呢種快歌，但水準好高。至於梁栢堅，一直都有留意亦好欣賞佢嘅作品，佢平時嘅詞作，同埋喺social media嘅post都係比較玩味，今次《Dummy》想做到自嘲、自己都想笑自己嗰種玩味感覺，所以今次就有呢個班底組合。」
《Dummy》MV由來自台灣、被譽為鬼才導演的伍致綸Ares Wu操刀，Ares執導的MV包括五堅情《MOON LANDING 月面著陸》、ALL IN 5《PRINCE》。舞蹈方面，姜濤請來偶像羅志祥的御用排舞老師大目編舞，姜濤說：「喺台灣甚至香港，所有排舞老師都識大目，佢係一個非常有經驗嘅排舞老師，所以非常榮幸有佢嘅參與，今次台灣團隊參與，俾我好多新感覺新體驗。」其中一個敲頭的動作，是姜濤構思：「一聽到前奏，第一時間就諗到敲頭，敲醒自己嘅動作，所以我有同大目老師講，我想將呢個動作放喺Signature Move入面。」
姜濤說歌詞可能對聽眾來說有點深奧，認為大家如只記得「Dummy」這一句歌詞，已達到目的：「藉木偶題材去講我自己，喺過去一段時間，慢慢變成一個木偶，自以為可以做到好多嘢，而唔知自己係一個被操控嘅木偶，希望自己可以覺醒，可以變成一個聽到人哋講嘢嘅Artist。」
تعليقات